وصايا مهمة ليلة امتحان طلاب الثانوية العامة

لازم ليلة الإمتحان و بأي طريقة تنام ٦ ساعات أو ٧ ساعات .. إياك تروح الإمتحان من غير نوم دماغك هتهرب منك ومش هتركز. ادواتك معاك مجهزها من بليل زى اقلام جاف واقلام رصاص وياريت فيبر كاسل ودرجته خفيفة عشان لو مسحت مايبانش اثره ومسطره مهم جدا وبراية واستيكة والألة الحاسبة لو امتحان فيه مسائل وطبعا رقم الجلوس الأصلى وبطاقتك الشخصية اوعى تنساها ● لازم تروح يوم أول مادة بدري نص ساعة علشان تعرف مكان لجنتك .. إياك تروح علي الميعاد بالظبط لأنك بكده هتضيع علي نفسك نص ساعة من وقت الإمتحان في التعرف علي مكان لجنتك و الجلوس فيه حتي تهدأ. ● بلاش تسمع حاجة من أصحابك سواء خير أو شر قبل الإمتحان .. يعني حرفيا .. أعزل نفسك و خليك في حالك . يعنى بالبلدى من البيت للجنة ومن اللجنة للبيت ● أول حاجة تعملها جوه اللجنة بعد الأدعية طبعا تكتب بياناتك بخط واضح ( لأنك بعد ما بتخرج من اللجنة الشيطان بيستلمك و يصورلك إنك لم تكتب بياناتك و ده للأسف يؤثر علي تركيزك في المادة التالية ). ● لازم تكون لابس ساعة في إيدك جوه اللجنة عشان تقدر تتحكم فى الوقت . وطبعا مش ساعة سمارت لأنها ممنوعة وهيتعملك محضر غش بيها فنعقل افضل . ● تعامل مع الأسئلة بكامل تركيزك و حاول تكون ثابت علي قدر الإمكان حتي لو شفت أسئلة مش عارفها . ● قراءة رأس السؤال .. قراءة رأس السؤال .. قراءة رأس السؤال .. مهم جداًااااااا لأنه بيعرفك المطلوب بدقة وكده تبدأ الإجابة صح. وكتير جدا الأجابة بتكون فى رأس السؤال فنركز ● وقت الإمتحان متظبط علي عدد الأسئلة وزيادة شوية مش تقلق من الوقت خااااالص . وابدأ بالأسئلة اللى واثق من اجابتها وظللها علطول ماتسيبهاش لأخر الأمتحان وتظلل . والأسئلة اللى شاكك فى اجابتها ظلل بالرصاص خفيف وتبقى ارجعلها فى النهاية وطبعا مش محتاجة اقولك حافظ على ورقة البابل شيت. امسح بالراحة واوعى تخرمها ولو لاقدر الله حصل من حقك تطلب ورقة تانية ● لو شفت سؤال - لا قدر الله - صعب و لقيت نفسك تنحت قدامه زيادة عن اللزوم سيبه و أنقل علي سؤال تاني و ابقي أرجع له بعدين. اوعى تضيع وقتك فى سؤال صعب لأن ده هيأثر على باقى الأسئلة ● لو أثناء اللجنة لاحظت إن المراقب بيتكلم مع زميله أو زميلته في اللجنة و يشوش عليك .. أرجوك خليك جرئ وأطلب منهم و بكل أدب إنه يساعدكم بتوفير هدوء اللجنة. ● لو أثناء اللجنة لاحظت صوت ضوضاء شديد جاى من خارج اللجنة من حقك تعترض وهما هيحلوا المشكلة ● خليك بارد و بلاش تخلي أي حاجة توترك .. يعني لو المراقب كل شوية يقول باقي كذا دقيقة ووقت الإمتحان يخلص خليك بارد و بلاش تتوتر .. لو حد في لجنتك اتظبط بيغش و عمل مشكلة و حصلت ضوضاء و صوت عالي خليك بارد و ركز في إجابتك و ورقتك و خليك فاكر إن مجهود سنة كاملة ممكن يضيع لو معرفتش تمسك أعصابك جوه اللجنة. ● جوه اللجنة لازم تكون مقاتل عنيد و بلاش تستسلم و تجاوب أي كلام بغرض إنك تخلص من الإمتحان و تخرج من اللجنة و خلاص. ماتسيبش التظليل لأخر ربع ساعة لأنك هتتوتر وتنقل غلط . حاول كل ١٠ اسئلة تنقل اجابتهم فى البابل شيت وبكده تضمن انك ظللت كل الأمتحان لو الوقت ازف وتطمن ● جوه اللجنة إياك إياك إياك تخرج دقيقة بدري عن الوقت المحدد .. استغل الوقت حتي أااخر ثانية جاوب و راجع مرة و اتنين وعشرة ● بعد الخروج من اللجنة ممنوع ممنوع تراجع مع حد من زمايلك .. اللي حصل حصل و الكلام في اللي فات نقصان عقل .. و علي طول تروح علي البيت و تجنب المشي في الشمس .. و إياك تفتح نت أو تراجع إجابتك منه ( و يا سيدي بعد آخر مادة في آخر يوم ابقي افتح نت و راجع مع زمايلك براحتك ). ● طوال أيام الامتحانات حافظ جدا علي التزامك الديني لأنه بيديك ثبات و راحة نفسية مطلوبين جدااااااً أيام الامتحانات.. أي ذكر وإستغفار مش محتاج منك وضوء وطهارة بس يفضل انك تخرج من بيتك متوضى وطبعا صلى ركعتين بنية التيسير قبل ما تمشي مع تمنياتي لكم بالنجاح والتوفيق